તા. 10 ઑક્ટોબર, 2026:લાયન્સ ક્લબ પોરબંદર દ્વારા શારદીય નવરાત્રિ નિમિત્તે તા. 10 ઑક્ટોબરથી 19 ઑક્ટોબર, 2026 દરમિયાન આયોજિત ‘મધુરમ રાસોત્સવ–2026’નો એમ.ડી. સાયન્સ કોલેજ, પોરબંદર ખાતે ભવ્ય અને ઉત્સાહભર્યા માહોલમાં શુભારંભ

10 Oct 2026

લાયન્સ ક્લબ પોરબંદર દ્વારા ‘મધુરમ રાસોત્સવ–2026’નો ભવ્ય શુભારંભ પોરબંદર, તા. 10 ઑક્ટોબર, 2026: લાયન્સ ક્લબ પોરબંદર દ્વારા ભારતીય સંસ્કૃતિ અને પરંપરાના પવિત્ર પર્વ શારદીય નવરાત્રિ નિમિત્તે તા. 10 ઑક્ટોબરથી 19 ઑક્ટોબર, 2026 દરમિયાન આયોજિત ‘મધુરમ રાસોત્સવ–2026’નો એમ.ડી. સાયન્સ કોલેજ, પોરબંદર ખાતે ભવ્ય અને ઉત્સાહભર્યા માહોલમાં શુભારંભ થયો હતો. કાર્યક્રમની શરૂઆત પરમ પૂજ્ય 108 જય વલ્લભ બાવાશ્રીના વરદ હસ્તે દીપ પ્રાગટ્ય કરીને કરવામાં આવી હતી. મા જગદંબાની આરાધના અને ભક્તિભાવથી તરબોળ વાતાવરણમાં ઉપસ્થિત મહાનુભાવોએ માતાજીના આશીર્વાદ પ્રાપ્ત કર્યા હતા. નવરાત્રિના પાવન પર્વની ઉજવણીના ભાગરૂપે આયોજિત આ રાસોત્સવમાં પોરબંદરના અનેક અગ્રણી નાગરિકો, મહાનુભાવો અને રાસપ્રેમીઓએ ઉત્સાહપૂર્વક ભાગ લીધો હતો. પરંપરાગત ગરબા અને રાસની રમઝટ વચ્ચે ખેલૈયાઓએ મન મૂકીને રાસ રમી નવરાત્રિના આનંદને બમણો કર્યો હતો. સમગ્ર પરિસર ભક્તિ, સંગીત અને ઉત્સાહના રંગે રંગાઈ ગયું હતું. આ પ્રસંગે લાયન્સ ક્લબ પોરબંદરના પ્રમુખ લાયન અશ્વિન ઠક્કર, સેક્રેટરી લાયન ચિરાગ કક્કડ, ટ્રેઝરર લાયન પ્રજ્ઞા ગજ્જર, ફર્સ્ટ વાઇસ પ્રેસિડેન્ટ લાયન કિશન મલકાણ, પ્રોજેક્ટ ચેરમેન લાયન તુષાર પારેખ તથા પોરબંદર મહાનગરપાલિકાના પ્રથમ મેયર શ્રી સાગર મોદી સહિત લાયન્સ ક્લબના સભ્યો અને અન્ય મહાનુભાવો ઉપસ્થિત રહ્યા હતા. 800થી વધુ ખેલૈયાઓની ઉપસ્થિતિએ મહોત્સવની શોભામાં અભિવૃદ્ધિ કરી હતી. મોડી રાત સુધી ખેલૈયાઓએ ઉત્સાહભેર રાસની રમઝટ બોલાવી હતી. ભારતીય સંસ્કૃતિ, ધાર્મિક શ્રદ્ધા અને સામૂહિક આનંદના સુંદર સમન્વય સાથે ‘મધુરમ રાસોત્સવ–2026’નો પ્રથમ દિવસ યાદગાર બન્યો હતો. લાયન્સ ક્લબ પોરબંદર દ્વારા આયોજિત આ મહોત્સવ નવરાત્રિના સમગ્ર દિવસો દરમિયાન નગરજનોને આનંદ, ઉમંગ અને સંસ્કૃતિના રંગે રંગવાનો સુંદર પ્રયાસ બની રહ્યો છે.