પોરબંદર, તા. 12 ઑક્ટોબર, 2026:ભારતીય સંસ્કૃતિ અને પરંપરાના પવિત્ર પર્વ શારદીય નવરાત્રિના અવસરે લાયન્સ ક્લબ પોરબંદર દ્વારા તા. 10થી 19 ઑક્ટોબર, 2026 દરમિયાન એમ.ડી. સાયન્સ કોલેજ, પોરબંદર ખાતે આયોજિત ‘મધુરમ રાસોત્સવ–2026’ ભવ્ય રીતે યોજાઈ રહ્યો છે.

12 Oct 2026

લાયન્સ ક્લબ પોરબંદરના ‘મધુરમ રાસોત્સવ–2026’ના બીજા નોરતે 1100થી વધુ ખેલૈયાઓએ ગરબાની રમઝટ બોલાવી માતા બ્રહ્મચારિણીની આરાધના સાથે નવરાત્રિની ઉજવણી, પોરબંદર પોલીસની સી ટીમ દ્વારા બહેન-દીકરીઓને સુરક્ષા અંગે માર્ગદર્શન પોરબંદર, તા. 12 ઑક્ટોબર, 2026: ભારતીય સંસ્કૃતિ અને પરંપરાના પવિત્ર પર્વ શારદીય નવરાત્રિના અવસરે લાયન્સ ક્લબ પોરબંદર દ્વારા તા. 10થી 19 ઑક્ટોબર, 2026 દરમિયાન એમ.ડી. સાયન્સ કોલેજ, પોરબંદર ખાતે આયોજિત ‘મધુરમ રાસોત્સવ–2026’ ભવ્ય રીતે યોજાઈ રહ્યો છે. નવરાત્રિના બીજા નોરતે પણ ઉત્સાહ, ઉમંગ અને ભક્તિમય વાતાવરણ વચ્ચે 1100થી વધુ ખેલૈયાઓએ ગરબા અને રાસની રમઝટ બોલાવી હતી. પરંપરાગત વેશભૂષામાં સજ્જ ખેલૈયાઓના ઉત્સાહથી સમગ્ર પરિસર નવરંગી બની ગયું હતું. કાર્યક્રમની શરૂઆત માતાજીની આરતી અને વંદના સાથે કરવામાં આવી હતી. નવરાત્રિના બીજા નોરતે મા દુર્ગાના બીજા સ્વરૂપ માતા બ્રહ્મચારિણીની પૂજા અને આરાધના કરવામાં આવે છે. ‘બ્રહ્મ’ એટલે તપસ્યા અને ‘ચારિણી’ એટલે તેનું આચરણ કરનાર. આમ, બ્રહ્મચારિણી એટલે તપનું આચરણ કરનારી દેવી. માતા પાર્વતીના આ તપસ્વી સ્વરૂપે ભગવાન શિવને પતિરૂપે પ્રાપ્ત કરવા માટે કઠિન તપસ્યા કરી હતી. માતા બ્રહ્મચારિણીનું સ્વરૂપ ત્યાગ, સંયમ, ધૈર્ય અને અડગ શ્રદ્ધાનો સંદેશ આપે છે. આ પ્રસંગે પોરબંદર પોલીસ વિભાગની ‘સી ટીમ’ દ્વારા બહેન-દીકરીઓની સુરક્ષાને ધ્યાનમાં રાખીને વિશેષ માર્ગદર્શન આપવામાં આવ્યું હતું. નવરાત્રિ દરમિયાન કોઈ અસામાજિક તત્ત્વો દ્વારા હેરાનગતિ કે અન્ય અયોગ્ય વર્તન કરવામાં આવે તો તેવા સંજોગોમાં કેવી રીતે સાવચેત રહેવું, પોલીસની મદદ કેવી રીતે મેળવવી અને પોતાની સુરક્ષા માટે કયા પગલાં લેવા તે અંગે ઉપયોગી જાણકારી આપવામાં આવી હતી. આ માર્ગદર્શનથી મહિલાઓ અને યુવતીઓમાં સુરક્ષા અંગે જાગૃતિ લાવવાનો પ્રયાસ કરવામાં આવ્યો હતો. ત્યારબાદ પોરબંદર શહેરના ખેલૈયાઓ વિવિધ રંગબેરંગી અને આકર્ષક પરંપરાગત વેશભૂષામાં સજ્જ થઈ સંગીતના તાલે મન મૂકીને ઝૂમી ઊઠ્યા હતા. પરંપરાગત ગરબા અને રાસની રમઝટ વચ્ચે સમગ્ર પરિસર ભક્તિ, સંગીત અને ઉત્સાહના રંગે રંગાઈ ગયું હતું. શહેરના અનેક અગ્રણી નાગરિકો, મહાનુભાવો અને રાસપ્રેમીઓએ પણ ઉત્સાહપૂર્વક ભાગ લઈ નવરાત્રિના આનંદમાં સહભાગી બની ભારતીય સંસ્કૃતિ અને પરંપરાને જીવંત રાખવાનો સુંદર સંદેશ આપ્યો હતો. આ પ્રસંગે લાયન્સ ક્લબ પોરબંદરના પ્રમુખ લાયન અશ્વિન ઠાકર, સેક્રેટરી લાયન ચિરાગ કક્કડ, ટ્રેઝરર લાયન પ્રજ્ઞા ગજ્જર, ફર્સ્ટ વાઇસ પ્રેસિડેન્ટ લાયન કિશન મલકાણ, સેકન્ડ વાઇસ પ્રેસિડેન્ટ લાયન હરદત્તપુરી ગોસ્વામી, લાયન સુભાષ ઠકરાર, પ્રોજેક્ટ ચેરમેન લાયન તુષાર પારેખ, લાયન આશિષ પંડ્યા તેમજ કેબિનેટ મંત્રી અર્જુન મોઢવાડિયાની વિશેષ ઉપસ્થિતિ રહી હતી. આ ઉપરાંત લાયન્સ ક્લબના અન્ય સભ્યો અને મહાનુભાવો પણ ઉપસ્થિત રહ્યા હતા. બીજા નોરતે 1100થી વધુ ખેલૈયાઓની ઉત્સાહભેર ઉપસ્થિતિએ ‘મધુરમ રાસોત્સવ–2026’ની શોભામાં અભિવૃદ્ધિ કરી હતી. મોડી રાત સુધી ચાલેલી ગરબા અને રાસની રમઝટે ખેલૈયાઓમાં અનેરો ઉત્સાહ જગાવ્યો હતો. ધાર્મિક શ્રદ્ધા, ભારતીય સંસ્કૃતિ, પરંપરા અને સામૂહિક આનંદના સુંદર સમન્વય સાથે નવરાત્રિનો બીજો નોરતો યાદગાર બની રહ્યો હતો. લાયન્સ ક્લબ પોરબંદર દ્વારા આયોજિત આ રાસોત્સવ શહેરના નાગરિકો માટે નવરાત્રિના ઉત્સવને માણવાનું સુંદર માધ્યમ બની રહ્યો છે.