લાયન્સ ક્લબ પોરબંદર દ્વારા તા. ૨૦-૦૮-૨૦૨૬ના રોજ લાયન દુર્ગાબેન આર. લાદીવાલાના જન્મદિવસની ઉજવણી શ્રી જલારામ વાત્સલ્ય ધામ ખાતે સિનિયર સિટીઝનો માટે મિષ્ટાન્ન-ફરસાણ સહિતના ભોજનનું આયોજન તથા ઉપયોગી કીટનું વિતરણ કરવામાં આવ્યું હતું.

20 Aug 2026

સિનિયર સિટીઝનો સાથે સેવાભાવથી લાયન્સ ક્લબ પોરબંદરે ઉજવ્યો લાયન દુર્ગાબેન લાદીવાલાનો જન્મદિવસ લાયન્સ ક્લબ પોરબંદર દ્વારા તા. ૨૦-૦૮-૨૦૨૬ના રોજ લાયન દુર્ગાબેન આર. લાદીવાલાના જન્મદિવસની ઉજવણી પ્રસંગે સાત દિવસીય સેવાકીય આયોજન અંતર્ગત શ્રી જલારામ વાત્સલ્ય ધામ ખાતે સિનિયર સિટીઝનો માટે મિષ્ટાન્ન-ફરસાણ સહિતના ભોજનનું આયોજન તથા ઉપયોગી કીટનું વિતરણ કરવામાં આવ્યું હતું. વર્ષ ૧૯૯૨થી પોરબંદરમાં અનેકવિધ સેવાકીય પ્રવૃત્તિઓ તેમજ વિવિધ સામાજિક સંસ્થાઓ સાથે સક્રિયપણે જોડાઈને સેવાકાર્યમાં યોગદાન આપનાર લાયન દુર્ગાબેન આર. લાદીવાલાના તા. ૧૭ ઓગસ્ટના પાવન જન્મદિવસ નિમિત્તે દર વર્ષે સાત દિવસીય સેવાકીય આયોજન કરવામાં આવે છે. આ સેવાકીય પરંપરાનો મુખ્ય ઉદ્દેશ સમાજના જરૂરિયાતમંદ વર્ગ સુધી સેવા, સહયોગ અને સ્નેહ પહોંચાડવાનો છે. આ પ્રસંગે શ્રી જલારામ વાત્સલ્ય ધામ ખાતે નિવાસ કરતા વડીલો અને સિનિયર સિટીઝનો માટે મિષ્ટાન્ન તથા ફરસાણ સહિતનું પૌષ્ટિક અને સ્વાદિષ્ટ ભોજન પીરસવામાં આવ્યું હતું. વડીલો સાથે આત્મીયતાપૂર્વક સમય વિતાવી તેમના આશીર્વાદ મેળવવામાં આવ્યા હતા. માત્ર ભોજન પૂરતું જ નહીં, પરંતુ વડીલોની દૈનિક જરૂરિયાતોને ધ્યાનમાં રાખીને ઉપયોગી સિનિયર સિટીઝન કીટનું પણ વિતરણ કરવામાં આવ્યું હતું. આ કીટમાં રોજિંદા જીવનમાં ઉપયોગી આવશ્યક સામગ્રીનો સમાવેશ કરવામાં આવ્યો હતો, જેથી વડીલોને તેમની દૈનિક જરૂરિયાતોમાં સહાય મળી રહે. વડીલો સમાજનો અમૂલ્ય વારસો છે. તેમના જીવનના અનુભવો, સંસ્કાર અને આશીર્વાદ નવી પેઢી માટે પ્રેરણારૂપ છે. વૃદ્ધાવસ્થામાં વ્યક્તિને માત્ર ભૌતિક સહાય જ નહીં, પરંતુ આત્મીયતા, સન્માન અને પોતાના હોવાનો અહેસાસ પણ જરૂરી હોય છે. આ ભાવનાને ધ્યાનમાં રાખીને લાયન્સ ક્લબ પોરબંદર દ્વારા સિનિયર સિટીઝનો સાથે સેવાભાવપૂર્વક આ કાર્યક્રમ યોજવામાં આવ્યો હતો. આ સેવાકીય પ્રવૃત્તિ માટે લાયન્સ ક્લબ પોરબંદર દ્વારા રૂપિયા ૬,૦૦૦/-નું ઓનલાઈન પેમેન્ટ કરવામાં આવ્યું હતું. કાર્યક્રમ દરમિયાન વડીલોના ચહેરા પર જોવા મળેલો આનંદ અને મળેલા આશીર્વાદે સેવાભાવ સાથે જોડાયેલા સૌના હૃદયને સ્પર્શી લીધા હતા. આ પ્રસંગે લાયન્સ ક્લબ પોરબંદરના પ્રેસિડેન્ટ લાયન શ્રી અશ્વિનભાઈ ઠાકર, લાયન નિધીબેન મોઢવાડિયા સહિતના અન્ય લાયન મિત્રો ઉપસ્થિત રહ્યા હતા અને સમગ્ર સેવાકીય પ્રવૃત્તિમાં સહભાગી બની વડીલો પ્રત્યેની લાગણી અને સન્માન વ્યક્ત કર્યું હતું. લાયન્સ ક્લબ પોરબંદરની આ સેવાપ્રવૃત્તિ દ્વારા “વડીલોની સેવા એટલે સમાજના સંસ્કારોની સેવા”નો સુંદર સંદેશ આપવામાં આવ્યો હતો.