લાયન્સ ઇન્ટરનેશનલના વિઝન સર્વિસ વીક–2026 અંતર્ગત લાયન્સ ક્લબ પોરબંદર દ્વારા તા. 15 ઑક્ટોબર, 2026ના રોજ રસિકબાપા રોટલાવાળા ટ્રસ્ટ સંચાલિત માતૃછાયા પ્રાથમિક શાળા, પોરબંદર ખાતે આંખના સ્વાસ્થ્ય અને દૃષ્ટિ જાગૃતિના સંદેશ સાથે ચિત્રકામ સ્પર્ધાનું આયોજન

15 Oct 2026

લાયન્સ ક્લબ પોરબંદર દ્વારા માતૃછાયા પ્રાથમિક શાળામાં આંખની જાગૃતિ વિષયક ચિત્રકામ સ્પર્ધા યોજાઈ પોરબંદર, તા. 15 ઑક્ટોબર, 2026: લાયન્સ ઇન્ટરનેશનલના વિઝન સર્વિસ વીક–2026 અંતર્ગત લાયન્સ ક્લબ પોરબંદર દ્વારા તા. 15 ઑક્ટોબર, 2026ના રોજ રસિકબાપા રોટલાવાળા ટ્રસ્ટ સંચાલિત માતૃછાયા પ્રાથમિક શાળા, પોરબંદર ખાતે આંખના સ્વાસ્થ્ય અને દૃષ્ટિ જાગૃતિના સંદેશ સાથે ચિત્રકામ સ્પર્ધાનું આયોજન કરવામાં આવ્યું હતું. કાર્યક્રમની શરૂઆત શાળાનાં પ્રિન્સિપાલ ભાવિષા મોદી દ્વારા સ્વાગત પ્રવચનથી કરવામાં આવી હતી. આંખના સ્વાસ્થ્યનું મહત્ત્વ, દૃષ્ટિની જાળવણી અને નેત્રદાન તથા નેત્રસંભાળ અંગે જાગૃતિ કેળવવાના હેતુથી યોજાયેલી આ સ્પર્ધામાં 100થી વધુ વિદ્યાર્થીઓએ ઉત્સાહપૂર્વક ભાગ લીધો હતો. વિદ્યાર્થીઓએ પોતાની કલ્પનાશક્તિ, સર્જનાત્મકતા અને ચિત્રકલાના કૌશલ્ય દ્વારા આંખની જાળવણી અને દૃષ્ટિના મહત્ત્વને સુંદર રીતે ચિત્રોમાં રજૂ કર્યું હતું. સ્પર્ધાના અંતે વિવિધ ધોરણોમાંથી પાંચ-પાંચ વિદ્યાર્થીઓને પ્રમાણપત્રો એનાયત કરી પ્રોત્સાહિત કરવામાં આવ્યા હતા. આ પ્રસંગે લાયન નિધિ શાહ મોઢવાડિયાના જન્મદિવસ નિમિત્તે 280થી વધુ વિદ્યાર્થીઓને કલર કીટનું વિતરણ કરવામાં આવ્યું હતું. આ પહેલનો હેતુ બાળકોમાં ચિત્રકલા પ્રત્યે રુચિ કેળવવા, તેમની સર્જનાત્મક પ્રતિભાને પ્રોત્સાહન આપવા અને કલાત્મક વિકાસને વેગ આપવાનો હતો. આ પ્રસંગે લાયન્સ ક્લબ પોરબંદરના પ્રેસિડેન્ટ લાયન અશ્વિન ઠાકર, લાયન પંકજ ચંદારાણા, લાયન નિધિ શાહ મોઢવાડિયા, લાયન અજય દત્તાણી, શાળાનાં પ્રિન્સિપાલ ભાવિષા મોદી, શિક્ષકગણ અને 280થી વધુ વિદ્યાર્થીઓ ઉપસ્થિત રહ્યા હતા. કાર્યક્રમને સફળ બનાવવા માટે ક્લબના સેક્રેટરી લાયન ચિરાગ કક્કડ, સર્વિસ વીક કમિટીના ચેરમેન લાયન દીપક લાખાણી તથા સેકન્ડ વાઇસ પ્રેસિડેન્ટ લાયન હરદત્તપુરી ગોસ્વામીએ વિશેષ જહેમત ઉઠાવી હતી. સુંદર સંદેશ: “આંખો છે તો દુનિયા છે, દૃષ્ટિ છે તો સપનાં છે અને સર્જનાત્મકતા છે તો સપનાંને સાકાર કરવાની નવી દિશા છે.” બાળકોમાં નેત્રસ્વાસ્થ્ય પ્રત્યે જાગૃતિ કેળવવાની સાથે તેમની સુષુપ્ત કલાપ્રતિભાને ઉજાગર કરવાનો આ પ્રયાસ સમાજસેવા અને બાળવિકાસનું સુંદર ઉદાહરણ બન્યો હતો. લાયન્સ ક્લબ પોરબંદરનો આ ઉપક્રમ એ સંદેશ આપે છે કે સાચી સેવા એ જ છે, જેમાં જાગૃતિ સાથે પ્રેરણા મળે, પ્રતિભાને પાંખો મળે અને બાળકોના ઉજ્જવળ ભવિષ્યને નવી દિશા મળે.