પોરબંદર, તા. ૧૬-૦૮-૨૦૨૬: લાયન્સ ક્લબ પોરબંદર દ્વારા લાયન દુર્ગાબેન આર. લાદીવાલાના આર્થિક સહયોગથી રૂપાળી બા હોસ્પિટલ, પોરબંદર ખાતે દર્દીઓ, પ્રસૂતાઓ તથા નવજાત શિશુઓ માટે સેવાકીય પ્રવૃત્તિનું આયોજન કરવામાં આવ્યું હતું

16 Aug 2026

લાયન્સ ક્લબ પોરબંદર દ્વારા રૂપાળી બા હોસ્પિટલ, પોરબંદર ખાતે દર્દીઓ અને પ્રસૂતાઓને પૌષ્ટિક આહાર તથા કીટ વિતરણ પોરબંદર, તા. ૧૬-૦૮-૨૦૨૬: લાયન્સ ક્લબ પોરબંદર દ્વારા લાયન દુર્ગાબેન આર. લાદીવાલાના આર્થિક સહયોગથી રૂપાળી બા હોસ્પિટલ, પોરબંદર ખાતે દર્દીઓ, પ્રસૂતાઓ તથા નવજાત શિશુઓ માટે સેવાકીય પ્રવૃત્તિનું આયોજન કરવામાં આવ્યું હતું. આ પ્રસંગે દર્દીઓને પૌષ્ટિક આહાર તથા પ્રસૂતાઓને આનુસાંગિક ભોજન આપવામાં આવ્યું હતું, તેમજ નવજાત શિશુઓ માટે ઉપયોગી કીટનું વિતરણ કરવામાં આવ્યું હતું. વર્ષ ૧૯૯૨થી પોરબંદરમાં વિવિધ સેવાકીય પ્રવૃત્તિઓ તથા સામાજિક અને સેવાભાવી સંસ્થાઓ સાથે સક્રિયપણે જોડાયેલા લાયન દુર્ગાબેન આર. લાદીવાલાના તા. ૧૭ ઓગસ્ટના પાવન જન્મદિવસ નિમિત્તે દર વર્ષે સાત દિવસીય સેવાકીય આયોજન કરવામાં આવે છે. આ સેવાકીય આયોજન અંતર્ગત આરોગ્ય અને માનવસેવાના ક્ષેત્રને પ્રાધાન્ય આપી આ કાર્યક્રમ યોજાયો હતો. હોસ્પિટલમાં સારવાર લઈ રહેલા દર્દીઓ માટે પૌષ્ટિક આહારનું વિશેષ મહત્વ છે. બીમારી દરમિયાન શરીરને જરૂરી પોષક તત્વો મળી રહે તે સ્વાસ્થ્ય સુધારવામાં મદદરૂપ બને છે. ખાસ કરીને પ્રસૂતા માતાઓ માટે પ્રસૂતિ બાદ યોગ્ય અને પૌષ્ટિક આહાર જરૂરી હોય છે, જ્યારે નવજાત શિશુની શરૂઆતની જરૂરિયાતોને ધ્યાનમાં રાખીને ઉપયોગી કીટનું વિતરણ કરવામાં આવ્યું હતું. આ સેવાકીય પ્રવૃત્તિનો મુખ્ય હેતુ હોસ્પિટલમાં સારવાર લઈ રહેલા જરૂરિયાતમંદ દર્દીઓ અને તેમના પરિવારજનોને માનવતાપૂર્ણ સહયોગ આપવાનો તથા માતા અને નવજાત શિશુની સંભાળ પ્રત્યે સમાજમાં જાગૃતિ અને સંવેદનાની ભાવના વધારવાનો હતો. લાયન્સ ક્લબ પોરબંદરના પ્રેસિડેન્ટ લાયન અશ્વિનભાઈ ઠાકરના માર્ગદર્શન હેઠળ યોજાયેલા આ સેવાકીય કાર્યક્રમમાં લાયન દુર્ગાબેન આર. લાદીવાલા તથા અન્ય લાયન મિત્રો સાથે હોસ્પિટલનો કર્મચારીગણ ઉપસ્થિત રહ્યો હતો. આ સેવાકીય પ્રવૃત્તિ દ્વારા લાયન્સ ક્લબ પોરબંદરે “સ્વસ્થ સમાજના નિર્માણ માટે માનવસેવા એ જ સાચી સેવા”નો સંદેશ આપ્યો હતો.