nasamukti abhiyan

10 Aug 2026

નશા મુક્તિ માટે સંકલ્પબદ્ધ બન્યા ખાપટ સીમ શાળા-1ના વિદ્યાર્થીઓ બ્રહ્માકુમારીઝ પોરબંદર અને લાયન્સ ક્લબ પોરબંદરના સંયુક્ત ઉપક્રમે “10 કરોડ નશા મુક્તિ પ્રતિજ્ઞા મહા અભિયાન” યોજાયું પોરબંદર, તા. 10-08-2026, સોમવાર: બ્રહ્માકુમારીઝ પોરબંદર અને લાયન્સ ક્લબ પોરબંદરના સંયુક્ત ઉપક્રમે “10 કરોડ નશા મુક્તિ પ્રતિજ્ઞા મહા અભિયાન” અંતર્ગત ખાપટ સીમ શાળા-1, પોરબંદર ખાતે નશા મુક્તિ અંગે જાગૃતિ કાર્યક્રમ યોજાયો હતો. કાર્યક્રમના પ્રારંભે શાળાના પ્રિન્સીપાલ ગીગન બાપોદરા દ્વારા ઉપસ્થિત મહેમાનો તથા સંસ્થાના પ્રતિનિધિઓનું શાબ્દિક સ્વાગત કરવામાં આવ્યું હતું. આ પ્રસંગે લાયન્સ ક્લબ પોરબંદરના પ્રેસિડન્ટ લાયન અશ્વિન ઠાકરે લાયન્સ ક્લબની સેવાકીય પ્રવૃત્તિઓનો પરિચય આપતાં નશા મુક્તિ અભિયાનના મહત્વ અંગે જણાવ્યું હતું કે, ભારત સરકારે નશા મુક્તિ માટે સામાજિક સંસ્થાઓ સાથે મળીને વિશાળ સ્તરે અભિયાન હાથ ધર્યું છે. આ અંતર્ગત પ્રજાપિતા બ્રહ્માકુમારી ઈશ્વરીય વિશ્વવિદ્યાલય સાથે MoU (સમજૂતી કરાર) કરવામાં આવ્યો છે અને દેશભરમાં 10 કરોડ લોકોને નશા મુક્તિની પ્રતિજ્ઞા લેવડાવવાનો મહત્ત્વાકાંક્ષી સંકલ્પ લેવામાં આવ્યો છે. તેમણે વધુમાં જણાવ્યું હતું કે, જો પ્રતિજ્ઞા લેનાર દરેક વ્યક્તિ અન્ય પાંચ લોકોને નશાથી દૂર રહેવા માટે પ્રેરણા આપી તેમની પાસે પણ પ્રતિજ્ઞા લેવડાવે, તો આ સંદેશ કરોડો લોકો સુધી પહોંચી શકે છે. નશાના કારણે અનેક પરિવારો આર્થિક અને સામાજિક રીતે બરબાદ થઈ રહ્યા છે. નશાની પ્રવૃત્તિમાં વપરાતું નાણું જો પરિવારના શિક્ષણ, આરોગ્ય અને વિકાસ પાછળ વપરાય તો પરિવારોનું જીવન વધુ સુખી અને સમૃદ્ધ બની શકે અને દેશના આર્થિક વિકાસને પણ વેગ મળી શકે. આ પ્રસંગે બ્રહ્માકુમારી કોમલ દીદીએ નશો કોને કહેવાય, નશાના વિવિધ પ્રકારો તથા વ્યસનથી થતા શારીરિક અને માનસિક નુકસાન અંગે વિદ્યાર્થીઓને સરળ અને અસરકારક રીતે માહિતગાર કર્યા હતા. વ્યસનના કારણે ગંભીર બીમારીઓનું જોખમ વધે છે અને વ્યક્તિ સાથે સમગ્ર પરિવાર પણ તેની અસર ભોગવે છે તે અંગે સમજ આપવામાં આવી હતી. બ્રહ્માકુમારી કોમલ દીદીએ વિદ્યાર્થીઓ તથા શિક્ષકગણને નશા મુક્ત જીવન જીવવા તેમજ પરિવાર, મિત્રો અને સમાજના અન્ય લોકોને પણ વ્યસનથી દૂર રહેવા પ્રેરિત કરવાની પ્રતિજ્ઞા લેવડાવી હતી. મોટી સંખ્યામાં વિદ્યાર્થીઓએ ઉત્સાહપૂર્વક પ્રતિજ્ઞા લઈ નશા મુક્ત સમાજના નિર્માણમાં પોતાનું યોગદાન આપવાનો સંકલ્પ કર્યો હતો. કાર્યક્રમ દરમિયાન વિદ્યાર્થીઓને ત્રણ મિનિટનું ધ્યાન (મેડિટેશન) કરાવવામાં આવ્યું હતું, જેના કારણે સમગ્ર વાતાવરણ શાંત, આધ્યાત્મિક અને પ્રેરણાદાયી બની ગયું હતું. લાયન્સ ક્લબ પોરબંદરના પ્રેસિડન્ટ લાયન અશ્વિન ઠાકરે ખાસ ભારપૂર્વક જણાવ્યું હતું કે, “નશો અટકાવવો એ માત્ર વ્યક્તિના સ્વાસ્થ્યનો પ્રશ્ન નથી, પરંતુ પરિવારની આર્થિક સુખાકારી અને દેશના અર્થતંત્ર સાથે પણ સીધો સંબંધ ધરાવે છે. નશામાં વેડફાતું નાણું જો બચાવીને શિક્ષણ, આરોગ્ય અને પરિવારના વિકાસમાં વપરાય તો દેશના આર્થિક સ્તરને મજબૂત બનાવવામાં મહત્વનું યોગદાન આપી શકાય છે. આ કાર્યમાં આજના વિદ્યાર્થીઓ અને યુવાનોની ભૂમિકા અત્યંત મહત્વપૂર્ણ છે.” આ પ્રસંગે લાયન્સ ક્લબ પોરબંદરના પ્રેસિડન્ટ લાયન અશ્વિન ઠાકર, લાયન પંકજ મોનાણી, શાળાના પ્રિન્સીપાલ ગીગન બાપોદરા, બ્રહ્માકુમારી કોમલ દીદી સહિત શાળાના શિક્ષકગણ અને મોટી સંખ્યામાં વિદ્યાર્થીઓ ઉપસ્થિત રહ્યા હતા. આજની યુવા પેઢી દેશનું અમૂલ્ય ધન છે. યુવાનો નશાથી દૂર રહેશે તો તેમનું સ્વાસ્થ્ય, શિક્ષણ, કારકિર્દી અને ભવિષ્ય વધુ ઉજ્જવળ બનશે. નશામાં વેડફાતું નાણું બચાવીને પરિવાર અને સમાજના વિકાસમાં વાપરવામાં આવે તો એક તરફ પરિવારો આર્થિક રીતે મજબૂત બનશે અને બીજી તરફ દેશના અર્થતંત્રને પણ વેગ મળશે. નશાની પાછળ પૈસા, સમય અને યુવાની વેડફવાને બદલે એ જ શક્તિનો ઉપયોગ શિક્ષણ, રમતગમત, સંસ્કાર, સેવા અને રાષ્ટ્રનિર્માણ માટે થાય તે આજની સૌથી મોટી જરૂરિયાત છે. “યુવા નશાથી દૂર, પરિવાર સમૃદ્ધ અને દેશ મજબૂત”—આ વિચારને સાકાર કરવા વિદ્યાર્થીઓએ પોતે નશાથી દૂર રહેવાની સાથે અન્ય લોકોને પણ જાગૃત કરવાનો સંકલ્પ કર્યો હતો. કાર્યક્રમના સફળ આયોજન માટે શાળાના પ્રિન્સીપાલ ગીગન બાપોદરા તથા સમગ્ર શિક્ષકગણે વિશેષ જહેમત ઉઠાવી હતી. “નશો છોડો, જીવન જોડો”ના સંદેશ સાથે યોજાયેલા આ અભિયાનનો મુખ્ય હેતુ આજની યુવા પેઢીને દરેક પ્રકારના હાનિકારક વ્યસનથી દૂર રાખી સ્વસ્થ, સંસ્કારી, જવાબદાર અને નશા મુક્ત સમાજનું નિર્માણ કરવાનો છે. વિદ્યાર્થીઓ દ્વારા લેવાયેલો આ સંકલ્પ આવતીકાલના નશા મુક્ત ભારતના નિર્માણમાં મહત્વપૂર્ણ પગલું બની રહેશે.