sanatry pad distribution

15 Aug 2026

જૂના જલારામ મંદિર,શિતળા ચોક પોરબંદરના સહયોગથી દીકરીઓ માટે સેનેટરી પેડ વિતરણ કાર્યક્રમ. જલારામ મંદિર દ્વારા અન્નક્ષેત્ર ઉપરાંત જરૂરિયાતમંદ લોકો માટે વિવિધ તબીબી કેમ્પો તથા અન્ય સેવાકીય પ્રવૃત્તિઓનું આયોજન કરવામાં આવે છે. મંદિરના ટ્રસ્ટી લાયન ભાવિક દેવાણી દ્વારા સમાજની જરૂરિયાતો અને ખાસ કરીને જરૂરિયાતમંદ વર્ગને ઉપયોગી થાય તેવી વિવિધ સેવાકીય પ્રવૃત્તિઓને સતત પ્રોત્સાહન આપવામાં આવે છે. આ સેવાકીય પરંપરાને આગળ વધારતાં 15 ઓગસ્ટ, 2026ના રોજ જૂના જલારામ મંદિરના સહયોગથી અને લાયન્સ ક્લબ પોરબંદરની સહભાગિતામાં દીકરીઓ માટે સેનેટરી પેડ વિતરણ કાર્યક્રમ યોજાયો હતો. દીકરીઓના સ્વાસ્થ્ય, વ્યક્તિગત સ્વચ્છતા અને માસિક સ્વચ્છતા અંગે જાગૃતિ વધે તેમજ જરૂરી સમયે તેમને ઉપયોગી સાધન સરળતાથી ઉપલબ્ધ બને તે હેતુથી સેનેટરી પેડનું વિતરણ કરવામાં આવ્યું હતું. આ સેવાકીય પ્રવૃત્તિમાં સહભાગી બનીને લાયન્સ ક્લબ પોરબંદરના સભ્યોએ સમાજોપયોગી સેવા કાર્ય કરવાનો આનંદ અને ગૌરવ અનુભવ્યું હતું. દીકરીઓના આરોગ્ય અને સ્વચ્છતા જેવા મહત્વપૂર્ણ વિષયને સેવા સાથે જોડવાનો આ પ્રયાસ સમાજમાં સકારાત્મક સંદેશ આપનારો બની રહ્યો હતો. કાર્યક્રમમાં લાયન્સ ક્લબ પોરબંદરના પ્રમુખ લાયન અશ્વિન ઠાકર, સેક્રેટરી લાયન ચિરાગ કક્કડ, લાયન પંકજ મોનાણી તેમજ જૂના જલારામ મંદિરના ટ્રસ્ટી લાયન ભાવિક દેવાણી સહિતના આગેવાનો ઉપસ્થિત રહ્યા હતા. ઉપસ્થિત મહાનુભાવોએ જણાવ્યું હતું કે, સમાજની જરૂરિયાતને ઓળખીને કરવામાં આવતી સેવા જ સાચા અર્થમાં લોકસેવા છે. દીકરીઓના આરોગ્ય અને સ્વચ્છતા સાથે જોડાયેલી આ પ્રવૃત્તિ માત્ર વસ્તુ વિતરણ પૂરતી મર્યાદિત ન રહેતાં સ્વચ્છતા, સ્વાભિમાન અને આરોગ્ય અંગે જાગૃતિ ફેલાવવાનું પણ મહત્વપૂર્ણ માધ્યમ બની રહે છે. જૂના જલારામ મંદિર અને લાયન્સ ક્લબ પોરબંદરની આ સંયુક્ત સેવાકીય પહેલને ઉપસ્થિત સૌએ આવકારી હતી અને ભવિષ્યમાં પણ સમાજના જરૂરિયાતમંદ લોકો માટે આવી લોકોપયોગી પ્રવૃત્તિઓ સતત ચાલુ રાખવાનો સંકલ્પ વ્યક્ત કર્યો હતો.